15 juli 2025

24 july ferskynt 'Oerbleaune Rimen en Teltsjes' by Bornmeer

Logo Noordboek

24 july ferskynt by Bornmeer

Oerbleaune Rimen en Teltsjes

 

Fan de bruorren Halbertsma

 

Philippus Breuker

De Rimen en Teltsjes hearre ta de klassiken fan de Fryske literatuer. It is it sammelwurk fan de bruorren Eeltsje, Tsjalling en Joast Halbertsma, dat mear as oardel iuw lyn foar it earst útkaam. It waard faak werprinte en ek oanfolle, mar dochs binne net alle literêre dichten en stikken fan de bruorren útjûn.

Undersyk fan Philippus Breuker nei harren teksten levere sa’n sechstich ûnbekende stikken op. It giet benammen om teksten fan Eeltsje en Tsjalling, dy’t skreaun binne tusken 1812 en 1857. Yn Oerbleaune Rimen en Teltsjes komme dy nije stikken oan it ljocht, foarsjoen fan ynliedende skôgingen en taljochtingen oan de hân fan brieven fan en oan de bruorren Halbertsma en har bern. Sa is mei dizze útjefte dan einlik it literêre wurk fan de grûnlizzers fan de Frysktalige literatuer kompleet beskikber.

Philippus Breuker (1939) publisearret oer skiednis, taal en literatuer fan Fryslân. Earder ferskynde fan syn hân Eelko Alta (1723-1798), De keunst as útwei en Fryslân yn de Gouden Iuw.

Oerbleaune Rimen en Teltsjes. Fan de bruorren Halbertsma | Philippus Breuker | ISBN 9789464713787 | Paperback | 216 siden | ferkeappriis € 22,90 | ferskynt 24 july by Bornmeer